Vansdaના વિકાસમાં ઐતિહાસિક ક્ષણ: અંબિકા નદી પર 'મેજર બ્રિજ'નું મંત્રી નરેશ પટેલના હસ્તે ખાતમુહૂર્ત

નવસારી જિલ્લાના વાંસદા તાલુકાના વિકાસમાં આજે એક સુવર્ણ પ્રકરણ ઉમેરાયું છે. આઝાદીના 78 વર્ષ બાદ અંતરિયાળ વિસ્તારના નાગરિકોની વર્ષો જૂની માગણી સંતોષાઈ છે. કાળાઆંબા-વાટી રોડ પર અંબિકા નદી ઉપર નિર્માણ પામનારા 'મેજર બ્રિજ'નું ગરિમામય ખાતમુહૂર્ત સંપન્ન થયું છે, જે આ વિસ્તારના પરિવહન અને પ્રગતિ માટે ગેમ-ચેન્જર સાબિત થશે.

ડઝનબંધ ગામડાઓ સીધા સંપર્કમાં આવશે

રાજ્યના કેબિનેટ મંત્રી નરેશભાઈ પટેલ અને લોકસભા દંડક તેમજ સાંસદ ધવલભાઈ પટેલની પ્રેરક ઉપસ્થિતિમાં આ ખાતમુહૂર્ત વિધિ યોજાઈ હતી. આ પ્રસંગે ડાંગના ધારાસભ્ય વિજયભાઈ પટેલ સહિતના મહાનુભાવો પણ હાજર રહ્યા હતા. આ બ્રિજનું નિર્માણ થવાથી ચોમાસા દરમિયાન વાહનવ્યવહાર ખોરવાઈ જવાની સમસ્યાનો કાયમી ઉકેલ આવશે અને ડઝનબંધ ગામડાઓ સીધા સંપર્કમાં આવશે.

ખેડૂતો અને વિદ્યાર્થીઓને પણ મોટો ફાયદો

ખાતમુહૂર્ત પ્રસંગે મંત્રીએ જણાવ્યું હતું કે, 'ડબલ એન્જિન સરકાર' છેવાડાના માનવી સુધી આધુનિક માળખાગત સુવિધાઓ પહોંચાડવા કટિબદ્ધ છે. આ બ્રિજ માત્ર નદી પરનો સેતુ નથી, પરંતુ અંતરિયાળ વિસ્તારના આર્થિક અને સામાજિક વિકાસનો નવો માર્ગ છે. 78 વર્ષની પ્રતીક્ષા બાદ શરૂ થયેલું આ કાર્ય વાંસદા અને નવસારી જિલ્લાના વિકાસની સફરને વધુ વેગ આપશે. આ પ્રોજેક્ટથી સ્થાનિક ખેડૂતો અને વિદ્યાર્થીઓને પણ મોટો ફાયદો થશે.

ગુજરાતના વધુ સમાચાર વાંચવા માટે ક્લિક કરો