Vav-Tharadના શિવ શક્તિ કોમ્પ્લેક્સમાં વીજ કરંટ લાગતાં 28 વર્ષીય યુવકનું કરુણ મોત!

બનાસકાંઠા જિલ્લાના વાવ-થરાદ પંથકમાંથી એક અત્યંત દુખદ અને આઘાતજનક સમાચાર સામે આવ્યા છે. થરાદના રેફરલ ત્રણ રસ્તા નજીક આવેલા શિવ શક્તિ કોમ્પ્લેક્સમાં ફર્નિચરનું કામ ચાલી રહ્યું હતું, તે દરમિયાન મજૂરી કામ માટે આવેલા એક યુવકનું વીજ કરંટ લાગવાથી કમકમાટીભર્યું મોત નીપજ્યું હતું. મૂળ રાજસ્થાનના વતની અને થરાદ ખાતે સુથારી કામ અર્થે રોકાયેલા 28 વર્ષીય પ્રકાશ પ્રજાપતિ ફર્નિચર અને ઇલેક્ટ્રિક સંબંધિત કામગીરી કરી રહ્યા હતા, ત્યારે અચાનક વીજ પ્રવાહ ચાલુ થઈ જવાથી અથવા કરંટ અડકી જવાથી આ ગંભીર દુર્ઘટના સર્જાઈ હતી.

રોજીરોટી કમાવા આવેલા યુવક પર આભ તૂટ્યું

વીજ કરંટ લાગતાં જ યુવક ગંભીર રીતે ઇજાગ્રસ્ત થઈને બેભાન થઈ ગયો હતો. ઘટનાની જાણ થતાં જ આસપાસના લોકો અને સ્થાનિકો તાત્કાલિક મદદે દોડી આવ્યા હતા અને યુવકને સારવાર અર્થે ખસેડવાની તજવીજ હાથ ધરી હતી. બાદમાં મૃતદેહને પોસ્ટમોર્ટમ અર્થે થરાદની સરકારી હોસ્પિટલ ખાતે ખસેડવામાં આવ્યો હતો, જ્યાં ફરજ પરના તબીબોએ યુવકને મૃત જાહેર કર્યો હતો.

હોસ્પિટલમાં તબીબોએ મૃત જાહેર કરતા પરિવારમાં શોકનું મોજુ

રોજીરોટી કમાવવા માટે પરપ્રાંતથી આવેલા યુવકના અચાનક અને આકસ્મિક અવસાનના સમાચાર રાજસ્થાન સ્થિત તેના પરિવારજનો સુધી પહોંચતા જ પરિવાર પર આભ તૂટી પડ્યું હતું અને સમગ્ર વિસ્તારમાં ગમગીની છવાઈ ગઈ હતી.

ગુજરાતના વધુ સમાચાર વાંચવા માટે ક્લિક કરો