Bharuch: ઝઘડિયાના ભાલોદ ખાતે પ્રાથમિક આરોગ્ય કેન્દ્રનું નવું મકાન બનશે
ઝઘડિયા તાલુકાના ભાલોદ ગામે નવા બનનારા પ્રાથમિક આરોગ્ય કેન્દ્રના મકાનનું બુધવારના રોજ સવારે 10 વાગ્યે ખાતમુહૂર્ત કરવામાં આવ્યું હતું. ભરૂચ જિલ્લા પંચાયતનાં પ્રમુખ ડિમ્પલબેન વિક્રમસિંહ રાજ, ઝઘડિયાના ધારાસભ્ય રિતેશભાઈ વસાવા તથા ભરૂચ જિલ્લા આરોગ્ય સમિતિના ચેરમેન વિમલભાઈ પટેલના હસ્તે વિધિવત્ત ખાતમુહૂર્ત કરવામાં આવ્યું હતું. ઉલ્લેખનીય છે કે ભાલોદ પ્રાથમિક આરોગ્ય કેન્દ્ર છેલ્લા સાત વર્ષથી પેટા આરોગ્ય કેન્દ્રના મકાનમાં કાર્યરત છે. હવે નવા મકાન માટે મંજૂરી મળતાં જૂના સરકારી દવાખાનાની જગ્યા પર નવા મકાનના નિર્માણની કામગીરી માટે ખાતમુહૂર્ત કરવામાં આવ્યું હતું. નવા પ્રાથમિક આરોગ્ય કેન્દ્રનું સુવિધાસભર મકાન તૈયાર થતાં આરોગ્ય કેન્દ્રના કાર્યક્ષેત્રમાં આવતાં આશરે 20 ગામોના લોકોને આરોગ્ય સેવાઓનો વધુ સારો લાભ મળી શકશે. આ પ્રસંગે આયુષ્માન આરોગ્ય મંદિર ભાલોદ, વણાકપોર, સંજાલી અને રતનપોરનું લોકાર્પણ પણ કરવામાં આવ્યું હતું. ખાતમુહૂર્ત અને લોકાર્પણના આ કાર્યક્રમ દરમિયાન ભરૂચ જિલ્લા પંચાયતનાં પ્રમુખ ડિમ્પલબેન રાજ તથા ઝઘડિયાના ધારાસભ્ય રિતેશભાઈ વસાવાએ પ્રસંગોચિત પ્રવચનો કર્યા હતા. આ કાર્યક્રમમાં તાલુકા પંચાયતના પ્રમુખ સરસ્વતીબેન વસાવા, તાલુકા પંચાયતના ઉપપ્રમુખ નરેન્દ્રભાઈ પટેલ, ભાજપાના અગ્રણી વિક્રમસિંહ રાજ, જિલ્લા ભાજપા બક્ષીપંચ મોરચાના મંત્રી મહેશભાઈ પાટણવાડિયા, જિલ્લા વિકાસ અધિકારી , જિલ્લા આરોગ્ય અધિકારી અને તાલુકા આરોગ્ય અધિકારી ઉપસ્થિત રહ્યા હતા.ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
