Godhra:અકસ્માત અટકાવવા બનાવાયેલા બમ્પથી અનેક વાહનચાલકો પટકાયા
ગોધરા શહેરના બામરોલી રોડ ઉપર સમ્રાટ નગર પાસે બનાવેલા બમ્પથી 15 થી વધુ વાહનચાલકોને અકસ્માત થતાં વાહનચાલકોમાં ભારે રોષ જોવા મળી રહ્યો છે. આ બમ્પ એટલો મોટો છે અને તેના પર પટ્ટા પણ લગાવાયા નહીં હોવાથી કે, ત્યાં કોઈ લાઈટ લગાવાઈ નહીં હોવાથી, રાત્રિ સમયે અનેક દ્વિચક્રી વાહનચાલકો રસ્તા ઉપર પટકાતાં ઇજાગ્રસ્ત થયા હતાં, જ્યારે કાર જેવા વાહનો પછડાતી જોવા મળે છે. જો કે, પેટ્રોલિંગ કરી રહેલી પોલીસે અને સ્થાનિક યુવાનોએ આ સ્થળે બેરીકેડીંગ કર્યું હતું.ગોધરાના બામરોલી રોડ ઉપર અનેક સોસાયટી વિસ્તાર આવેલા છે. આ રોડ ઉપર 24 કલાક વાહનોની અવરજવર રહેતી હોય છે, અને અકસ્માતો પણ સર્જાતા હોય છે. જેથી સબંધિત વિભાગ દ્વારા અકસ્માતોને ઘટાડવા માટે તાજેતરમાં આ માર્ગ ઉપર સમ્રાટ નગર પાસે મોટા બમ્પ બનાવાયા છે. પરંતુ આ સ્પીડબ્રેકરો એટલા મોટા બનાવી દીધા અને તેના ઉપર રિફ્લેક્ટર કે સફેદ પટ્ટા નહીં લગાવતા દૂરથી સ્પીડમાં આવતા વાહન ચાલકોને આ બમ્પ નહીં દેખાતાં અંદાજિત 15 થી વધુ દ્વિચક્રી વાહન ચાલકો આ સ્થળે રોડ પર પટકાવાના અને અકસ્માતનો ભોગ બની ઈજાગ્રસ્ત પણ થયા હતા. અધુરામાં પુરૂ આ સ્થળે લાઈટ પણ નહીં હોવાના કારણે રાત્રિ સમયે વાહન ચાલકોને બમ્પ નહીં દેખાતા અકસ્માત સર્જાયા હતા. દરમિયાન રાત્રિ પેટ્રોલિંગ કરતી શહેર પોલીસની ટીમે સ્થાનિક યુવાનોની મદદથી આ સ્થળે તાત્કાલિક બેરીકેડિંગ કરી દીધુ હતું, તેમજ કેટલાક યુવાનો વાહનચાલકોને રોકી વાહનો ધીમે હંકારવા સાવચેત કરતાં જોવા મળ્યા હતા. સબંધિત વિભાગ દ્વારા વહેલી તકે આ બમ્પ ઉપર રિફ્લેક્ટર કે સફેદ પટ્ટા લગાવવા અને બમ્પને નાના કરવા માંગ કરાઈ રહી છે. ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
