Vadodara News: સંસ્કારી નગરીમાં અસંસ્કારી હરકતોનો વીડિયો વાયરલ
‘સંસ્કારી નગરી’ ગણાતી વડોદરા નગરીની વિશ્વવિખ્યાત મહારાજા સયાજીરાવ યુનિવર્સિટી (MSU) ફરી એકવાર મારામારીની ઘટનાને પગલે વિવાદમાં આવી છે. યુનિવર્સિટીની આર્ટસ ફેકલ્ટીની કેન્ટીન પાસે અસામાજિક તત્વો અને કેટલાક વિદ્યાર્થીઓએ મળીને એક નિર્દોષ વિદ્યાર્થી પર જીવલેણ હુમલો કરતા કેમ્પસમાં ભયનો માહોલ ફેલાયો હતો.સિક્યુરિટીની હાજરીમાં જ બેલ્ટથી માર માર્યો ઘટનાની મળતી માહિતી અનુસાર, આર્ટસ ફેકલ્ટીની કેન્ટીન બહાર કેટલાક લુખ્ખાઓ અને વિદ્યાર્થીઓનો જમાવડો થયો હતો. આ દરમિયાન કોઈ જૂની અદાવત અથવા સામાન્ય બોલાચાલીમાં એક વિદ્યાર્થી પર અન્ય જૂથના વિદ્યાર્થીઓએ હુમલો કરી દીધો હતો. હુમલાખોરોએ શિસ્તની તમામ મર્યાદાઓ ઓળંગીને વિદ્યાર્થીને બીભત્સ ગાળો ભાંડી હતી અને જાહેરમાં બેલ્ટ વડે બેફામ માર માર્યો હતો. આશ્ચર્યની વાત એ છે કે, કેમ્પસમાં સિક્યુરિટી ગાર્ડ્સ તૈનાત હોવા છતાં હુમલાખોરો બેખૌફ બનીને હુમલો કરતા રહ્યા હતા. કેમ્પસમાં નાસભાગ અને અસલામતીની લાગણી કેન્ટીન જેવા જાહેર સ્થળે થયેલી આ મારામારીને પગલે ત્યાં નાસ્તો કરી રહેલા અન્ય વિદ્યાર્થીઓમાં ભારે નાસભાગ મચી ગઈ હતી. વિદ્યાર્થીઓના આક્ષેપ મુજબ, યુનિવર્સિટીમાં છેલ્લા કેટલાક સમયથી અસામાજિક તત્વોનો જમાવડો વધી રહ્યો છે. કેન્ટીન અને ફેકલ્ટીની બહાર આવા તત્વો ગમે ત્યારે મારામારી કરે છે, જેના કારણે નિયમિત અભ્યાસ માટે આવતા વિદ્યાર્થીઓની સુરક્ષા સામે સવાલો ઉભા થયા છે. આ ઘટનાના વીડિયો સોશિયલ મીડિયા પર વાયરલ થતા યુનિવર્સિટી પ્રશાસન અને પોલીસની કામગીરી પર માછલા ધોવાઈ રહ્યા છે. હાલમાં આ મામલે સત્તાધીશો દ્વારા તપાસના આદેશ આપવામાં આવ્યા છે. આ પણ વાંચો - Vadodara મનપાની કચેરી બહાર વાહનચાલકો વચ્ચે મારામારી, એક કલાક સુધી ટ્રાફિક જામ
Read Full Story arrow_forward
