Stay informed with the latest happenings, achievements, and announcements from our community.
ગુજરાત અને દેશ દુનિયાના સમાચાર સંદેશ ન્યૂઝના આ ન્યૂઝ બ્લોગ પર ક્લિક કરીને વાંચી શકશો. 20 ઓક્ટોબરના બ્રેકીંગ ન્યૂઝ વાંચવા માટે આ પેજ પર બનેલા રહો અને રિફ્રેશ કરતા રહો
Read Full Story arrow_forward
માંગરોળ તાલુકાનાં વાંકલ ગામે પાનેશ્વર નજીક ભૂખી નદીનાં રમણીય તટે બિરાજમાન શ્રી સિંધવાઇ માતાજીનાં પાવન ધામમાં આસો સુદ આઠમનાં પવિત્ર દિવસે શ્રદ્ધાળુઓનું ઘોડાપુર ઉમટયુ હતુ. નવરાત્રી નિમિતે વહેલી સવારથી જ મંદિર પરિસરમાં દર્શનાર્થીઓની લાંબી કતારો જોવા મળી હતી. ભક્તો શ્રદ્ધાપૂર્વક માતાજીનો ગરબો માથે ધારણ કરી મંદિર પહોંચ્યા હતા અને મંદિર પ્રાંગણમાં ભક્તિભાવ સાથે ગરબે ઘૂમી માતાજીનાં દર્શન કરી ભક્તોએ ધન્યતા અનુભવી હતી. આ સાથે મંદિરે પૂજા અને યજ્ઞ તથા હવનનું પણ આયોજન કરવામાં આવ્યું હતું. મહોત્ત્સવ દરમ્યાન ધોળીકુઇ ગામનાં શ્રી ભાથીજી યુવક મંડળ દ્વારા ઉત્કૃષ્ટ સેવાભાવ દાખવીને દૂરદૂરથી આવતા તમામ ભક્તો માટે ઠંડી છાશ અને પીવાનાં શુદ્ધ પાણીનું વિતરણ કરવામાં આવ્યુ હતુ. મંદિર પરિસરમાં ભક્તોની ભારે ભીડને પગલે ઉત્ત્સાહભર્યા લોકમેળા જેવો માહોલ સર્જાયો હતો. અહીં ખાણીપીણી, અવનવા રમકડાં, પૂજા માટે શ્રીફળ તેમજ ફૂલહારની અનેક દુકાનો ધમધમી ઊઠી હતી, જેનાં થકી સ્થાનિક નાના વેપારીઓ અને ગ્રામીણ પરિવારોને ઉત્તમ રોજગારીની તક મળી હતી. બીજી તરફ, આસ્થાનાં આ મહત્ત્વપૂર્ણ યાત્રાધામ સુધી પહોંચવા માટે ખરાબ રસ્તાને કારણે ભક્તોને ભારે યાતના વેઠવી પડી રહી છે. આ અંગે સિંધવાઇ માતાજીનાં અનન્ય ભક્ત ફતેસિંહભાઇએ જણાવ્યુ હતુ કે, ગામથી મંદિર સુધી પહોંચતો મુખ્ય માર્ગ અત્યંત ખરાબ અને પથરાળ હાલતમાં હોવાથી સમસ્યા વધે છે. અહીં સત્વરે પાકો રસ્તો બનાવવા સ્થાનિક રાજકીય આગેવાનો સમક્ષ ભારપૂર્વક રજૂઆત કરવામાં આવી છે.ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
વર્તમાન સમયમાં જ્યારે પાર્ટી પ્લોટોમાં મોંઘી ફી ચૂકવીને અને આધુનિક ગીતોના ઘોંઘાટ વચ્ચે ગરબા રમવાનું ચલણ વધ્યું છે, ત્યારે કામરેજ તાલુકાના લસકાણા ગામે આહીર સમાજમાં પરંપરા અને સંસ્કૃતિને જાળવી રાખતો પ્રેરણાદાયી નજારો જોવા મળ્યો હતો. લસકાણા સ્થિત આહીર સમાજની વાડી ખાતે આયોજિત ભવ્ય નવરાત્રી મહોત્સવમાં આઠમા નોરતે 1 હજારથી વધુ પુરુષો-મહિલાઓ પરંપરાગત પરિધાન અને સોના-ચાંદીનાં ઘરેણાંથી સજ્જ થઇને એકસાથે ગરબે ઘૂમ્યા હતા. દેશી ઢબ અને પ્રાચીન પરંપરા અનુસાર ગરબે ઝૂમતા ખેલૈયાઓની રમઝટે ઉપસ્થિત સૌ કોઇને મંત્રમુગ્ધ કરી દીધા હતા. આજના દેખાડા અને ઝાકમાળ ભરેલા યુગમાં પણ પોતાની વિરાસતને અકબંધ રાખવા માટે આહીર સમાજ છેલ્લા 25થી 30 વર્ષીયથી આ ઉત્સવનું અવિરત આયોજન કરી રહ્યો છે. સમાજની દીકરીઓને ગરબા રમવા માટે બહાર ન જવું પડે અને તેમને સુરક્ષિત તથા સંસ્કારી પારિવારિક વાતાવરણ મળી રહે તેવા ઉમદા આશય સાથે આ પરંપરા શરૂ કરવામાં આવી હતી. આ મહોત્સવ અંગે આહીર સમાજના યુવા પ્રમુખ કલ્પેશ આહીરે જણાવ્યું કે, આ આયોજન પાછળનો મુખ્ય ઉદ્દેશ્ય નવી પેઢી પોતાની મૂળ સંસ્કૃતિ સાથે જોડાયેલી રહે તે સુનિશ્ચિત કરવાનો છે. અહીં નાના બાળકોથી લઇને વડીલો અને યુવાનો સૌ કોઇ એક છત નીચે એકત્ર થઇને ઉત્સાહભેર જગદંબાની ઉપાસના કરે છે, જે સમાજની એકતા અને સમરસતાનું ઉત્તમ ઉદાહરણ પૂરું પાડે છે. આ ભવ્ય અને સંસ્કૃતિપ્રધાન આયોજનમાં રાજ્યના આરોગ્ય મંત્રી પ્રફુલ પાનસેરીયા પણ ખાસ ઉપસ્થિત રહ્યા હતા. તેમણે આયોજન બિરદાવી જણાવ્યું હતું કે, આધુનિકતાના પ્રભાવ વચ્ચે પણ પોતાની પવિત્ર પરંપરા, શિસ્ત અને લોકસંસ્કૃતિને ગૌરવભેર જીવંત રાખવા બદલ આહીર સમાજ અભિનંદનને પાત્ર છે. પુરુષો અને મહિલાઓનો પારંપરિક પહેરવેશ અને શિસ્તબદ્ધ ગરબા સમાજની ભવ્ય ઓળખને ઉજાગર કરે છે.ગુજરાતના વધુ સમાચાર વાંચવા માટે ક્લિક કરો
Read Full Story arrow_forward