Bayad : જ્વેલર્સ, ઓટો ડીલર્સને ખરીદીમાં તેજીની અપેક્ષા
આવતીકાલે તા.20 મીએ દશેરાનું પર્વ છે. લોકોમાં વિજયાદશમીના તહેવારની ઉજવણીનો ઉમંગ જોવા મળી રહ્યો છે. તા. 20મી ઓક્ટોબરે મંગળવારે સાબરકાંઠા અને અરવલ્લી જિલ્લામાં અનેક સ્થળોએ રાવણદહનના કાર્યક્રમોનું આયોજન થયું છે. દશેરાનું પર્વ ફાફડા અને જલેબીનો સ્વાદ માણ્યા વિના અધૂરું ગણાય. ત્યારે દશેરા પૂર્વે ફરસાણની દુકાનોએ ફાફડા બનાવવાનું કામ પૂરજોશમાં ચાલી રહ્યું છે. જો કે આ વર્ષે ફાફડા, જલેબી અને લીલવાની કચોરીના ભાવોમાં વધારો થયો છે. દશેરાની ઉજવણીથી તહેવારોની રોનક છેક દિવાળી સુધી જોવા મળશે. ત્યારે જિલ્લાવાસીઓમાં આગામી દિવસોમાં તહેવારોના આગમનને લઇને ઉત્સાહ જોવા મળી રહ્યો છે. રાવણદહનના કાર્યક્રમો માટે આયોજનોને અંતિમ ઓપ અપાયો છે. તા.20 ઓક્ટોબરે મંગળવારે દશેરાનો તહેવાર છે. વિજયાદશમીથી પ્રકાશના પર્વ એવા દિવાળીના તહેવારોની રોનક બજારોમાં જોવા મળતી હોય છે, સાથે જ તહેવારોની ઉજવણીનો ઉમંગ પણ રહેતો હોય છે. આમ એક રીતે દશેરાથી તહેવારોનો પ્રારંભ થવા જઇ રહ્યો છે. દશેરાનો તહેવાર ફાફડા અને જલેબી તેમજ લીલવાની કચોરીની જ્યાફત માણ્યા વિના અધુરો માનવામાં આવે છે. આ દિવસે ફાફડા અને જલેબી ખાવાની પરંપરા વર્ષોથી ચાલી આવી છે. ત્યારે બંન્ને જિલ્લામાં ફરસાણના વેપારીઓએ ફાફડા અને જલેબી તેમજ લીલવાની કચોરી બનાવવા માટે તૈયારીઓને આખરી ઓપ આપ્યો છે. ફરસાણના વેપારીઓના જણાવ્યા મુજબ આ વર્ષે પણ ફાફડા અને જલેબીની ડિમાન્ડ રહેશે. આ ઉપરાંત દશેરાએ લીલવાની કચોરીની પણ માગ રહેતી હોય છે. જો કે ગત વર્ષની સરખામણીએ ભાવ વધ્યા હોવાનું ફરસાણના વેપારીઓનું કહેવું છે. દશેરાએ ક્ષત્રિય સમાજ દ્વારા શસ્ત્ર પુજન સહિતના કાર્યક્રમોનું પણ આયોજન થતું હોય છે. આ ઉપરાંત ક્ષત્રિય સમાજ દ્વારા રેલીઓ યોજવા તૈયારીઓ શરૂ કરાઇ છે. દર વર્ષે દિવાળીના તહેવારો બાદ મોટા પાયે લગ્નપ્રસંગો યોજાતા હોય છે. વિશેષ કરીને જેમના ઘેર લગ્નપ્રસંગો હોય તેવા પરિવારો દશેરાએ સોના-ચાંદીના દાગીના, સોનાની લગડી ખરીદી મૂહુર્ત કરતા હોય છે. પરંતુ હાલમાં સોનું અને ચાંદીના ભાવો આસમાને પહોંચેલા છે, આમ છતાં નવા દાગીનાની ખરીદી માટે જ્વેલર્સ પણ આશાવાદી છે. આ ઉપરાંત વિજયાદશમીનો તહેવાર નવાં વાહનોની ખરીદી માટે પણ શ્રેષ્ઠ દિવસ મનાય છે. આ દિવસે લોકો નવાં વાહનોની ખરીદી કરતા હોય છે. ઓટો ડીલર્સને આ વર્ષે ગ્રાહકોની ઇન્ક્વાયરી પ્રમાણે અત્યારથી બુકીંગ મળી રહ્યા છે. દશેરાનું મૂહુર્ત સાચવવા ઓટો ડીલર્સની દોડધામ વધી ગઇ છે. આ સાથે જ નવા મકાનોમાં ગૃહપ્રવેશ માટે પણ આયોજન કર્યાં છે. દશેરાએ રાવણદહનના કાર્યક્રમોને લઇને પણ તૈયારીઓ થઇ છે.ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
