Community News & Updates

Stay informed with the latest happenings, achievements, and announcements from our community.

All News

calendar_today October 19, 2026

Mahesana : દેણપમાં હજારો ભક્તોની હાજરીમાં આઠમની આરતી થઈ

મહેસાણા જિલ્લાના દેણપ ગામમાં સદીઓ જુની માનતા અને માતાજીના કરવટાની પરંપરા આજે પણ આધુનિક યુગમાં યથાવત જળવાઈ છે. ધંધા-રોજગાર અને શિક્ષણ માટે દેશ-વિદેશમાં સ્થળાંતર થયેલા દેણપના પાટીદાર સહિતના તમામ ગ્રામજનો નવરાત્રિમાં અચૂક ગામમાં આવે છે અને અંબાજી માતાની સેવા-પૂજા -આરતીનો લાભ લેવાનું ચુકતા નથી. દેણપના ગ્રામજનો પરિવારમાં પુત્ર જન્મ કે પુત્ર-પુત્રીના લગ્ન અથવા ભાણેજના જન્મના વર્ષે નવરાત્રિ નકોરડા ઉપવાસ સાથે અંબાજી માતાના મંદિરમાં રહીને માતાજીની સેવાપૂજા કરે છે. મંદિરમાં ચાર વખત થતી આરતીમાં ભાગ લઈ રાત્રિ રોકાણ પણ મંદિરમાં જ કરવાનું કરવટાની પરંપરા હોંશે હોંશે નિભાવે છે. આ વર્ષે પણ 652 જેટલા ઉપવાસીઓ મંદિરમાં સળંગ આઠ દિવસ માતાજીના સાનિધ્યમાં રહ્યા હતા. આઠમના દિવસે મુખ્ય આરતીની ઉછામણીમાં ગામના સ્વ. પટેલ કાશીબેન જોઈતારામભાઈ અંબારામભાઈ (ગામી) પરિવારે રૂ. 21.10 લાખની ઉછામણી બોલીને માતાજીના આરતીના મુખ્ય યજમાન બનવાનો લાભ લીધો હતો. દેણપના વતની હોય અને વિદેશમાં રહેતા હોય કે દેશમાં અન્ય ઠેકાણે પણ દેણપના અંબાજી માતામાં દરેક ગ્રામજનો અતૂટ શ્રધ્ધા ધરાવે છે. આ આઠમે દેણપના અંબાજી મંદિરમાં 10 હજારથી વધુ ભાવિકો આરતીમાં જોડાયા હતા અને મશાલ આરતીનો લાભ લીધો હતો.ગુજરાતના વધુ સમાચાર વાંચવા માટે ક્લિક કરો

Read Full Story arrow_forward

calendar_today October 19, 2026

Mahesana : લાડોલના હરસિદ્ધિ શક્તિપીઠમાં દશેરા પર્વની ઉજવણી

લાડોલ સ્થિત 1200 વર્ષ જૂના હરસિદ્ધિ શક્તિપીઠ ખાતે આસો નવરાત્રી પર્વની ભક્તિભાવપૂર્વક ઉજવણી થઈ રહી છે. નવરાત્રી દરમિયાન માતાજીનાં વિશેષ પૂજન-અર્ચન અને ધાર્મિક અનુષ્ઠાનો યોજાય છે. મહંત અશ્વિન જાની અને વિશ્વાસ જાનીના જણાવ્યા મુજબ, હરસિદ્ધિ માતાજીની સાથે અહીં તંત્ર માર્ગની દશ મહાવિદ્યાઓ પણ બિરાજમાન છે. નવરાત્રીના નવેય દિવસ માતાજીને રાજભોગમાં સુરણનું શાક, શીરો અને દહીં અર્પણ કરવામાં આવે છે. નોમના દિવસે માતાજીને સુવર્ણ થાળમાં નૈવેદ્ય ધરાવવામાં આવ્યો હતો. આ ઉપરાંત સમસ્ત ગ્રામજનો દ્વારા યજ્ઞનું આયોજન કરી માતાજીને નૂતન ધજા અર્પણ કરવામાં આવી હતી. સંતાન પ્રાપ્તિની બાધાની પરંપરા નવરાત્રીના દસમા દિવસે દશેરા પર્વની વિશેષ ઉજવણી કરવામાં આવશે. આ દિવસે મંદિરના ચાચર ચોકમાં ભક્તોના સહયોગથી ભવ્ય રાસ-ગરબાનું આયોજન કરાયું છે. સંતાન પ્રાપ્તિ, લગ્નસંબંધ અને નોકરી-ધંધા સહિતની મનોકામનાઓ માટે ભક્તો માતાજીની બાધા રાખે છે. ખાસ કરીને સંતાન પ્રાપ્તિની બાધા પૂર્ણ થયા બાદ દંપતીઓ પોતાની શક્તિ અનુસાર માટી, તાંબા કે ચાંદીના ગરબા માતાજીને અર્પણ કરે છે. દશેરા પર્વે યોજાનારી મહાઆરતીમાં પવિત્ર યાત્રાધામ વિકાસ બોર્ડ, ગુજરાતના સચિવ રમેશ મેરજા મુખ્ય મહેમાન તરીકે ઉપસ્થિત રહેશે. આ ઉપરાંત અન્ય સામાજિક અને રાજકીય અગ્રણીઓ પણ ઉપસ્થિત રહેશે. મહંત અશ્વિનભાઈ જાની અને હરસિદ્ધિ માતાજી મંદિર ટ્રસ્ટ દ્વારા શ્રદ્ધાળુઓને દશેરા મહોત્સવમાં સહભાગી થવા ભાવભર્યું આમંત્રણ પાઠવવામાં આવ્યું છે.ગુજરાતના વધુ સમાચાર વાંચવા માટે ક્લિક કરો

Read Full Story arrow_forward

calendar_today October 19, 2026

Mahesana : મોઢેરા-મીઠી ઘારીયાલ રોડ પર ગમખ્વાર અકસ્માત : બાઈકસવારનું મોત, બે ઘાયલ

મોઢેરા નજીક મોઢેરા-મીઠીઘારીયાલ રોડ પર કિયા કાર અને મોટરસાઇકલ વચ્ચે ગમખ્વાર અકસ્માત સર્જાયો હતો. આ અકસ્માતમાં મોટરસાઇકલ પર સવાર એક વ્યક્તિનું ગંભીર ઇજાઓના કારણે ઘટનાસ્થળે જ મોત નીપજ્યું હતું.જ્યારે અન્ય બે વ્યક્તિઓને ઇજાઓ પહોંચતાં સારવાર માટે મહેસાણા સિવિલમાં ખસેડવામાં આવ્યા હતા. આ અંગે મળતી ફરિયાદની વિગતો મુજબ, સમલીયાપુરા ગામે રહેતા તારાબેન નટુભાઈ દેવીપૂજકના પતિ નટુભાઈ સહિત ત્રણ વ્યક્તિઓ મોટરસાઇકલ (નં.GJ-02-EH-6783) પર સવાર થઈ ખેતરેથી ઘરે પરત ફરી રહ્યા હતા. દરમિયાન તા. 18 ઓક્ટોબર, 2026ના રોજ સાંજના આશરે 5:30થી 6.00 વાગ્યાની વચ્ચે મોઢેરા-મીઠી ઘારીયાલ રોડ પર મોઢેરા તરફ્થી આવતી કિયા કાર (નંGJ-01-WU-0924)ના ચાલકે પૂરઝડપે અને ગફ્લતભરી રીતે કાર હંકારી મોટરસાઇકલને પાછળથી ટક્કર મારી હતી. આ અકસ્માતમાં નટુભાઈને શરીરે ગંભીર ઇજાઓ થતાં તેમનું ઘટનાસ્થળે જ મોત નીપજ્યું હતું. જ્યારે તેમની સાથે સવાર રમેશભાઈ દેવીપૂજક અને રણવીરસિંહ જાડેજાને ઇજાઓ પહોંચતાં 108 એમ્બ્યુલન્સ મારફ્તે સારવાર માટે મહેસાણા સિવિલ હોસ્પિટલમાં લઈ જવામાં આવ્યા હતા. અકસ્માતની જાણ થતાં મૃતકનાં પત્ની અને પરિવારજનો ઘટનાસ્થળે પહોંચ્યા હતા. ત્યારબાદ મૃતદેહને પોસ્ટમોર્ટમ માટે બેચરાજી સિવિલ હોસ્પિટલ ખાતે લઈ જવામાં આવ્યો હતો. પોસ્ટમોર્ટમની કાર્યવાહી પૂર્ણ થયા બાદ મૃતદેહ પરિવારજનોને અંતિમવિધિ માટે સોંપવામાં આવ્યો હતો. અકસ્માત સર્જ્યા બાદ કિયા કારનો ચાલક કાર સાથે ઘટનાસ્થળેથી નાસી ગયો હતો. આ મામલે મૃતકનાં પત્ની તારાબેન નટુભાઈ દેવીપૂજકે કારચાલક વિરુદ્ધ કાયદેસરની કાર્યવાહી કરવા મોઢેરા પોલીસ સ્ટેશન ફરિયાદ નોંધાવી છે.ગુજરાતના વધુ સમાચાર વાંચવા માટે ક્લિક કરો

Read Full Story arrow_forward