Community News & Updates

Stay informed with the latest happenings, achievements, and announcements from our community.

All News

calendar_today October 24, 2026

Tharad : ભડવેલમાં UGC નાવિરોધમાં શપથ લેવાયા

વાવ તાલુકાના ભાચલી ગામમાં UGCના વિરોધની શરૂઆત બાદ ભડવેલ ગામમાં પણ સવર્ણ સમાજના લોકોએ એકજૂથ થઈ પોતાનો વિરોધ વ્યક્ત કર્યો હતો. સમાજના લોકોએ UGCના કાયદા સામે વાંધો ઉઠાવી તેમાં જરૂરી સુધારા કરવાની માંગ કરી હતી. સાથે જ જો કાયદામાં સુધારો કરવામાં નહીં આવે તો આગામી સમયમાં યોજાનારી ચૂંટણીઓનો બહિષ્કાર કરવાની ચીમકી પણ ઉચ્ચારવામાં આવી હતી.વિરોધ નોંધાવનારા લોકો દ્વારા સ્પષ્ટ કરવામાં આવ્યું હતું કે તેમનો વિરોધ કોઈ એક રાજકીય પક્ષ સામે નથી, પરંતુ UGCના કાયદા અને તેની જોગવાઈઓ સામે છે. સમાજના લોકોની માંગ છે કે સંબંધિત કાયદામાં જરૂરી સુધારા કરવામાં આવે અને તેમની રજૂઆતોને ગંભીરતાથી લેવામાં આવે. સમાજના આગેવાનો અને ઉપસ્થિત લોકોએ એકસાથે અવાજ ઉઠાવી પોતાની માંગણીઓ પ્રત્યે સરકારનું ધ્યાન દોરવાનો પ્રયાસ કર્યો હતો. કાયદામાં સુધારો નહીં થાય તો આગામી ચૂંટણીઓમાં મતદાન પ્રક્રિયાથી દૂર રહેવા અથવા ચૂંટણી બહિષ્કારનો માર્ગ અપનાવવાની ચીમકી આપવામાં આવી હોવાનું જણાવાયું છે. વાવ તાલુકામાં ભાચલી બાદ ભડવેલ ગામે પણ UGCના વિરોધમાં શપથ લેવાતાં હવે તાલુકાના અન્ય ગામોમાં પણ આ મુદ્દે કેવી પ્રતિક્રિયા જોવા મળે છે તેના પર સૌની નજર ટકેલી છે. એક પછી એક ગામોમાં વિરોધની પ્રવૃત્તિઓ સામે આવતાં સ્થાનિક રાજકીય વર્તુળોમાં પણ ચર્ચાઓ તેજ બની રહી છે.UGCના મુદ્દે સવર્ણ સમાજ દ્વારા ઉઠાવવામાં આવેલી માંગણીઓ અને ચૂંટણી બહિષ્કારની ચીમકી આગામી સમયમાં કેવો વળાંક લે છે તે જોવું મહત્ત્વનું રહેશે. હાલ તો વાવ તાલુકામાં UGC ના વિરોધનો મુદ્દો ચર્ચાના કેન્દ્રમાં આવ્યો છે અને કાયદામાં સુધારાની માંગ સાથે સમાજના લોકો દ્વારા પોતાનો વિરોધ વ્યક્ત કરવામાં આવી રહ્યો છે.હવે જોવાનું એ રહેશે કે UGC ના કાયદામાં સુધારાની માંગ અંગે સંબંધિત તંત્ર અને સરકાર તરફ્થી શું પગલાં લેવામાં આવે છે અને વાવ તાલુકામાં ચાલી રહેલા આ વિરોધનો આગામી દિવસોમાં કેવોપ્રભાવ જોવા મળે છે.ગુજરાતના વધુ સમાચાર વાંચવા માટે ક્લિક કરો

Read Full Story arrow_forward

calendar_today October 24, 2026

Kalol : સઈજમાં ડાય બનાવતી ફેક્ટરીથી સ્વાસ્થ્યને ખતરો

કલોલ હાઈવે ઉપર સઈજ જીઆઈડીસીમાં સહયોગ ઓર્ગેનિક પ્રાઈવેટ લિમિટેડ નામની કંપની આવેલી છે આ કંપની દ્વારા વાતાવરણમાં ઝેરી ગેસ સહિતના રસાયણો છોડવામાં આવે છે. જેના કારણે કલોલવાસીઓ ત્રાહિમામ પોકારી ઉઠયા છે. અગાઉ આ પ્લાન્ટમાં ગંભીર અકસ્માતો બનેલા છે. જેને લઈને ગુજરાત પ્રદુષણ નિયંત્રણ બોર્ડ દ્વારા તપાસ હાથ ધરવામાં આવી હતી. તેમ છતાં કંપની સામે કોઈ કાર્યવાહી કરવામાં ન આવતા ગંભીર પ્રશ્નો ઉભા થવા પામ્યા છે. આ અંગે મળતી માહિતી અનુસાર કલોલના હાઈવે ઉપર સઈજ જીઆઈડીસીમાં સહયોગ ઓર્ગેનિકસ પ્રાઈવેટ લિમિટેડ નામની કંપની આવેલી છે આ કંપનીમાં કેમિકલ ડાય બનાવવામાં આવે છે. જેના માટે જોખમી રસાયણોનો ઉપયોગ કરવામાં આવે છે. તેમજ અતિ ગંભીર પ્રકારનો કહી શકાય તેવા ગેસનો પણ તેમાં ઉપયોગ કરાય છે. જેનાથી ડાય બનાવવામાં આવે છે. કંપની દ્વારા કલોલના વાતાવરણમાં ઝેરી વાયુ અને રસાયણો છોડવામાં આવતા હોવાના કારણે કલોલ વાસીઓ ત્રાહિમામ પોકારી ઉઠયા છે. રાત પડતા જ એક અલગ જ પ્રકારની ગંધ વાતાવરણમાં પ્રસરી જાય છે. અને લોકોને નાકમાં બળતરા સહિત આંખમાં બળતરા થવી જેવા આરોગ્ય સંબંધિત પ્રશ્નો ઉભા થવા પામ્યા છે. અગાઉ આ કંપનીમાં બે ગંભીર દુર્ઘટનાઓ સર્જાઈ હતી. જેમાં અગાઉ બનેલી આ ઘટનામાં સ્વામિનારાયણ ગુરુકુળમાં હોસ્ટેલમાં રહીને અભ્યાસ કરતી ત્રણ વિદ્યાર્થીનીઓ ગેસ ગળતરના કારણે બેભાન થઈ ગઈ હતી. અને તેમના જીવ ઉપર જોખમ ઉભું થવા પામ્યું હતું. તેને લઈને કંપનીની સામે વિદ્યાર્થીઓએ ભારે દેખાવો કરીને વિરોધ વ્યકત કર્યો હતો. ત્યારે ગુજરાત પ્રદુષણ નિયંત્રણ બોર્ડના અધિકારીઓએ કંપનીની મુલાકાત લઈને કંપનીને બંધ કરવાની નોટીસ ફટકારી દીધી હતી. તેમ છતાં કંપની ચાલુ રહી હતી. અને બીજી વાર બનેલી દુર્ઘટનામાં ગેસ ગળતરથી બાજુની કંપનીમાં રહેતી એક મહિલા ઘટના સ્થળે બેભાન થઈ ગઈ હતી. આ પ્રકારના ગંભીર બનાવો બન્યા હોવા છતાં ગુજરાત પ્રદુષણ નિયંત્રણ બોર્ડને પણ આ કંપનીના સંચાલકો ઘોળીને પી ગયા છે. અને કોઈને પણ ગાંઠતા નથી તાજેતરમાં ગુજરાત પ્રદુષણ નિયંત્રણ બોર્ડની ટીમ દ્વારા પ્લાન્ટની ઓચિંતી મુલાકાત લીધી હતી. ત્યારે હવે આ તપાસમાં શું સામે આવે છે અને કેવા પગલા ભરવામાં આવે છે તે જોવું રહ્યું.ગુજરાતના વધુ સમાચાર વાંચવા માટે ક્લિક કરો

Read Full Story arrow_forward

calendar_today October 24, 2026

Mahesana : સુર્ય મંદિરથી વિખ્યાત મોઢેરાના પ્રવાસન વિકાસને ગ્રહણ

મોઢેરા સૂર્યમંદિર જગપ્રસિદ્ધ બન્યું છે. જેના કારણે વર્ષે દહાડે લાખો પ્રવાસીઓ સૂર્ય મંદિરની મુલાકાતે આવી રહ્યા છે. પરંતુ વૈશ્વિક મહત્ત્વ ધરાવતા આ ઐતિહાસિક સ્થળનો જેવી રીતે અને જે પ્રકારે વિકાસ થવો જોઈએ તે ન થયો હોવાનું ચિત્ર ઉપસી રહ્યું છે. એક તરફ્ મોઢેરા સૂર્યમંદિરની મુલાકાતે આવતા પ્રવાસીઓની સંખ્યામાં વધારો થઈ રહ્યો છે. તો બીજી તરફ્ પ્રવાસીઓને લાંબો સમય રોકાવા માટે જરૂરી પાયાની સુવિધાઓનો અભાવ જોવા મળી રહ્યો છે. વર્ષો અગાઉ મોઢેરા સૂર્યમંદિરની નજીક આવેલી 84 વીઘા જમીનમાં પથરાયેલી વિશાળ તળાવના બ્યુટીફ્કિેશનનું કામ પ્રવાસન વિભાગ દ્વારા કરોડોના ખર્ચે કરવામાં આવ્યું હતું. પરંતુ કામગીરીમાં વ્યાપક ગેરરીતિઓ અને યોગ્ય દેખરેખના અભાવે આજે તળાવની હાલત કથળી ગઈ છે. તળાવમાં ગાંડા બાવળનાં ઝુંડ ઊગી નીકળ્યાં છે. જ્યારે તેની આસપાસ પ્રવાસીઓ માટે વિકસાવવામાં આવેલી સુવિધાઓ પણ જર્જરિત બની ગઈ છે. તળાવની ફરતે બનાવવામાં આવેલો વોકવે અને બોટિંગ એરિયા પણ હાલ બિસ્માર હાલતમાં ભાસી રહ્યો છે. પરિણામે, અહીં મુલાકાતે આવતા પ્રવાસીઓને નિરાશા સાંપડી રહી છે.આજે દરરોજ હજારોની સંખ્યામાં પ્રવાસીઓ આવે છે. તેમ છતાં, પ્રવાસીઓ બે-પાંચ કલાક રોકાઈ શકે અને સ્થળના ઐતિહાસિક વારસાની સાથે પ્રાકૃતિક સૌંદર્યનો આનંદ માણી શકે તેવી પૂરતી સુવિધાઓનો અભાવ છે. સૂર્યમંદિરની મુલાકાતે આવતા પ્રવાસીઓ માટે રાત્રિના સમયે રોકાવાની સુવિધા, પૂરતું લાઇટિંગ, સ્વચ્છ શૌચાલય અને મનોરંજનની અન્ય સુવિધાઓ ઊભી કરવામાં આવે તો પ્રવાસનને વધુ વેગ મળી શકે તેમ છે. પરંતુ આવી પાયાની સુવિધાઓના અભાવે પ્રવાસીઓ અહીં લાંબો સમય રોકાવાનું ટાળે છે.ગુજરાતના વધુ સમાચાર વાંચવા માટે ક્લિક કરો

Read Full Story arrow_forward