Chhota Udepur: નર્મદા જિલ્લાના ખેડૂતો જ નર્મદા સિંચાઇ યોજનાના લાભથી વંચિત
છોટાઉદેપુર, પંચમહાલ અને દાહોદ જિલ્લાના જળાશયો તથા તળાવોમાં નર્મદા નદીનું પાણી પહોંચાડવા માટે રૂપિયા 5,497 કરોડની નર્મદા લિફ્ટિંગ યોજનાને મંજૂરી મળતાં ખાસ કરીને નબળા ચોમાસા અને સિંચાઈના પાણીની અછતનો સામનો કરતા વિસ્તારોમાં આ નિર્ણયને મહત્વપૂર્ણ પગલાં તરીકે જોવામાં આવી રહ્યો છે. આ યોજનાના કારણે ત્રણ જિલ્લાઓના જળાશયો અને તળાવોમાં નર્મદાનું પાણી પહોંચશે, જેના પરિણામે ખેડૂતોને સિંચાઈ માટે પાણી ઉપલબ્ધ થવાની શક્યતા વધશે. છોટાઉદેપુર, પંચમહાલ અને દાહોદ જિલ્લાના ખેડૂતો માટે આ ખુશીના સમાચાર છે પરંતુ નર્મદા જિલ્લા માટે ઘરના છોકરા ઘંટી ચાટે અને પાડોશીને આંટો જેવો ઘાટ ઘડાયો છે. નર્મદા જિલ્લામાં નર્મદા નદી અને જળાશયની નજીક જ અસ્તિત્વ ધરાવતા દેડિયાપાડા, ચિકદા અને સાગબારા તાલુકાના ખેડૂતોને નર્મદા જળનું ટીપુ પણ મળતુ નથી. હવે ખેડૂતો સવાલ કરી રહ્યા છે કે અન્ય જિલ્લાઓને જો નર્મદા નદીના જળનો લાભ મળી રહ્યો છે તો નર્મદા જિલ્લામાં લિફ્ટિંગ દ્વારા સિંચાઈના પાણી કયારે મળશે, નર્મદા જિલ્લાના ધારાસભ્ય અને બે સાંસદો કેમ આ બાબતે મૌન છે.? અગત્યની વાત એ છે કે નર્મદા જિલ્લો નર્મદા નદીના કાંઠે આવેલો હોવા છતાં દેડિયાપાડા, ચિકદા અને સાગબારા તાલુકાના ખેડૂતો આજે પણ સિંચાઈના પૂરતા પાણી માટે મુશ્કેલીનો સામનો કરી રહ્યા છે. આ વિસ્તારના ખેડૂતોની લાંબા સમયથી માંગ છે કે નર્મદા નદીના પાણીનો સિંચાઈ માટે મહત્તમ ઉપયોગ થાય અને સ્થાનિક જળાશયો, તળાવો તથા ચેકડેમોમાં નર્મદાનું પાણી પહોંચાડવામાં આવે.નબળા ચોમાસાની સ્થિતિમાં ખેડૂતોને વરસાદ આધારિત ખેતી પર નિર્ભર રહેવું પડે છે. જો નર્મદા નદીનું પાણી લિફ્ટિંગ યોજનાઓ મારફ્તે આ દેડિયાપાડા ચિકદા અને સાગબારા તાલુકાના જળાશયો સુધી પહોંચાડવામાં આવે તો ખેતીને મોટો આધાર મળી શકે.ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
