Anand: ખેતરમાં રોઝ ભગાડવા મુદ્દે બે પરિવારો વચ્ચે મારામારી થઈ
ઉમરેઠ તાલુકાના સરદારપુરા સીમમાં આવેલી ગોહિલી તલાવડી વીસ વિસ્તારના ખેતરમાં રોઝ ભગાડવાની બાબતે બે પરિવારો વચ્ચે મારામારી થતાં છને વત્તા ઓછા પ્રમાણમાં ઈજાઓ થવા પામી હતી. આ અંગે ભાલેજ પોલીસે બંને પક્ષોની ફરિયાદો લઈને ગુનાઓ દાખલ કરીને ધરપકડનાં ચક્રો ગતિમાન કર્યાં છે.મળતી માહિતી મુજબ ફરિયાદી મનુભાઈ ગોતાભાઈ ઠાકોરે આપેલી પોતાની ફરિયાદીમાં જણાવ્યું છે કે, ગત છઠ્ઠી તારીખના રોજ સાંજના પાંચેક વાગ્યાના સુમારે તેમના બંને પુત્રો સુનિલ અને ઘનશ્યામે તેમના ખેતરમાંથી રોઝ ભગાડતાં પડોશી કનુ કિશાભાઈ બારૈયાના ખેતરમાં રોઝ ગયા હતા. જેથી ધ્રુવીલ કનુભાઈ બારૈયા તથા અશ્વિન કનુભાઈ બારૈયાએ બંનેએ ગમે તેમ અપશબ્દો બોલીને જણાવેલ કે, અમારા ખેતર બાજુ રોઝ કેમ મોકલો છો તેમ કહેતાં તેમને અપશબ્દો બોલવાની ના પાડતાં જ ધ્રુવીલ લોખંડની પાઈપ અને અશ્વિન ધારીયું લઈને આવી પહોંચ્યો હતો અને ધ્રુવીલે લોખંડની પાઈપ ઘનશ્યામને ડાબા હાથમાં મારી દેતાં ફ્રેક્ચર થઈ જવા પામ્યું હતું. સુનિલ ગભરાઈને ત્યાંથી ભાગવા જતાં ધ્રુવીલે તેને પણ લોખંડની પાઈપ ડાબા હાથે મારી દેતાં તેને પણ ફ્રેક્ચર થઈ જવા પામ્યું હતું. મનુભાઈ છોડાવવા વચ્ચે પડતાં અશ્વિને ધારીયું મારવા જતાં તેઓ નમી ગયા હતા. જેથી માથાના પાગળના ભાગે વાગી જતાં ચામડી ચીરાઈને લોહી નીકળ્યું હતું એ સાથે જ મનુભાઈ નીચે પડી જતાં બંને શખ્સોએ આજે તો બચી ગયા છો, ફરીથી અમારા ખેતરમાં રોઝ મોકલશો તો તમને જીવતા નહીં જવા દઈએ, તેવી જાનથી મારી નાંખવાની ધમકી આપી હતી. જ્યારે સામાપક્ષે નીતાબેન કનુભાઈ બારૈયાએ આપેલી ફરિયાદમાં જણાવ્યું હતું કે, રોઝ તેમના ખેતરમાં મોકલવા બાબતે સુનિલ મનુભાઈ ઠાકોરે ગમે તેમ અપશબ્દો બોલ્યા હતા. જેથી તેને અપશબ્દો નહીં બોલવાનું કહેતાં જ તે ઘરે જતો રહ્યો હતો. ત્યારબાદ અશ્વિનભાઈ નીતાબેન પાસે આવ્યા હતા. સુનિલ ઘરેથી લાકડી લઈ આવ્યો હતો અને ઘનશ્યામ ઠાકોર લાકડાનો ડંડો તેમજ મનુ ઠાકોર હાથમાં ધારીયું લઈને આવી પહોંચ્યા હતા અને આજે તો તમને મારવાના જ છે તેમ જણાવીને મનુ ઠાકોરે નીતાબેનના માતાના માથામાં ધારીયું મારતાં કપાળ ઉપર ઈજાઓ થવા પામી હતી. નીતાબેન પોતાની માતાને છોડાવવા વચ્ચે પડતાં સુનિલે લાકડીથી તેમજ મનુ ઠાકોર અને ઘનશ્યામ ઠાકોરે પણ લાકડીથી માર મારીને તેમજ ગડદાપાટુનો માર મારીને જાનથી મારી નાંખવાની ધમકી આપી હતી. ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
