Tharad : ભાભર વિસ્તારના ખેડૂતોનું સિંચાઇના પાણી માટે મામલતદારને આવેદનપત્ર
વાવ-થરાદ જિલ્લાના ભાભર તાલુકાના નેસડા, ચેમ્બુવા, વડાણા સહિત આસપાસનાં ગામોમાં નર્મદા કેનાલનું પાણી પૂરતા પ્રમાણમાં ન પહોંચતાં ખેડૂતોમાં ભારે રોષ અને ચિંતા જોવા મળી રહી છે. આ મુદ્દે ખેડૂતોએ ભાભર મામલતદાર કચેરી ખાતે પહોંચ્યા હતા અને આવેદનપત્ર આપીને તાત્કાલિક પાણીની વ્યવસ્થા કરવાની માંગ કરી હતી. સ્થાનિક ખેડૂતોના જણાવ્યા અનુસાર, ચાલુ વર્ષે વિસ્તારમાં વરસાદ થયો હોવા છતાં ખેતી અને પશુપાલન માટે પાણીની જરૂરિયાત યથાવત છે. બીજી તરફ્, કેનાલનું પાણી છેવાડાનાં ગામો સુધી પૂરતા પ્રમાણમાં ન પહોંચતાં ખેડૂતોને મુશ્કેલીઓનો સામનો કરવો પડી રહ્યો છે. ખાસ કરીને રવિ પાકની વાવણીના સમયે સિંચાઈના પાણીની અછત ખેડૂતો માટે ચિંતાનો વિષય બની છે. સમયસર પાણી ન મળે તો વાવણી અને પાકના ઉત્પાદન પર વિપરીત અસર થવાની ભીતિ ખેડૂતો વ્યક્ત કરી રહ્યા છે. આ ઉપરાંત પશુઓ માટે ઘાસચારો ઉગાડવા અને પાણીની જરૂરિયાત પૂરી કરવામાં પણ મુશ્કેલી ઊભી થવાની શક્યતા છે. ખેડૂતોના જણાવ્યા મુજબ, સમસ્યા અંગે અગાઉ પણ સંબંધિત સિંચાઈ વિભાગ સમક્ષ રજૂઆતો કરાઈ હોવા છતાં સમસ્યાનો કાયમી ઉકેલ આવ્યો નથી. આ અંગે લેખિત રજૂઆત કરીને નેસડા, ચેમ્બુઆ, વડાણા સહિતનાં ગામોમાં નર્મદા કેનાલનું સ્થળ નિરીક્ષણ કરવામાં આવે અને છેવાડાનાં ગામો સુધી પૂરતું પાણી પહોંચે તે માટે તાત્કાલિક જરૂરી કાર્યવાહી કરવા માંગ કરી છે.ગુજરાતના વધુ સમાચાર વાંચવા માટે ક્લિક કરો
Read Full Story arrow_forward