મુખ્યમંત્રી ભૂપેન્દ્ર પટેલે અંબાજી મંદિરમાં દર્શન કર્યા
શારદીય નવરાત્રિના આઠમા નોંરતે મુખ્યમંત્રી ભુપેન્દ્રભાઈ પટેલે પ્રસિદ્ધ યાત્રાધામ અંબાજી ખાતે પહોંચીને જગતજનની માં અંબેના ચરણોમાં ભાવપૂર્વક શીશ ઝુંકાવ્યું હતું. મહા અષ્ટમીના પવિત્ર અને ફળદાયી અવસરે મુખ્યમંત્રીએ સુપ્રસિદ્ધ 51 શક્તિપીઠ પૈકીના મુખ્ય એવા અંબાજી મંદિરમાં વિધિવત પૂજા-અર્ચના અને દર્શન કરીને ધન્યતા અનુભવી હતી.શાસ્ત્રોક્ત મંત્રોચ્ચાર વચ્ચે જગતજનની માં જગદંબાની વિશેષ પૂજા અને આરતી મુખ્યમંત્રીએ સંપન્ન કરી હતી. રવિવારે દુર્ગાષ્ટમીના પાવનકારી અવસરે તેમણે સૌની સુખાકારી, નિરામય સ્વાસ્થ્ય અને સર્વાંગી પ્રગતિ માટે માં અંબેના ચરણોમાં ભાવપૂર્વક પ્રાર્થના કરી હતી. ગુજરાત સતત વિકાસના નવા આયામો સર કરે, રાજ્યમાં શાંતિ, સમરસતા અને સમૃદ્ધિ કાયમ રહે તથા વિકાસની યાત્રાને માં આદ્યશક્તિના આશીર્વાદ સદાય મળતા મળતી રહે તેવી મંગલકામના મુખ્યમંત્રીએ વ્યક્ત કરી હતી. દર્શન-પૂજન બાદ મુખ્યમંત્રીએ નવરાત્રિ પર્વ દરમ્યાન દૂર-દૂરથી અંબાજી ધામ દર્શને આવતા માઈભક્તો માટે કરવામાં આવેલી સુવિધાઓ, સુરક્ષા અને દર્શન વ્યવસ્થા અંગે જિલ્લા વહીવટી તંત્ર પાસેથી જાણકારી મેળવી હતી. મંદિર પરિસરમાં ઉપસ્થિત વિશાળ શ્રાદ્ધાળુ સમુદાયે જય અંબેના જયઘોષ સાથે મુખ્યમંત્રીનું અભિવાદન કર્યું હતું. આ પ્રસંગે જિલ્લા પંચાયતના પ્રમુખ વસંત પુરોહિત, સર્વે ધારાસભ્ય અનિકેત ઠાકર, માવજી દેસાઈ, જિલ્લા કલેકટર મિહિર પટેલ, જિલ્લા વિકાસ અધિકારી એમ. જે. દવે, પોલીસ અધિક્ષક પ્રશાંત સુંબે સહિતના અધિકારીઓ અને મહાનુભાવો ઉપસ્થિત રહ્યા હતા. આ ઉપરાંત શક્તિપીઠ અંબાજીમાં રવિવારે આઠમના પર્વ નિમિત્તે વહેલી સવારથી મોડી સાંજ સુધી મોટીસંખ્યામાં માઈ ભક્તોએ દર્શનનો લ્હાવો લઈને ધન્યતા અનુભવી હતી.ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
