Navasari : મકાનના ટેરેસ પર મોબાઈલ ટાવરના જનરેટરમાં આગથી દોડધામ
નવસારી શહેરના પશ્ચિમ વિસ્તારમાં આવેલા જલાલપોરના ગૌરીશંકર મહોલ્લામાં સોમવારે બપોરે એક ત્રણ માળના મકાનના ટેરેસ પર ઊભા કરાયેલા મોબાઈલ ટાવરના જનરેટરમાં અચાનક આગ લાગવાની ઘટના બનતા સમગ્ર વિસ્તારમાં ભારે ગભરાટ અને અફરાતફરીનો માહોલ સર્જાયો હતો. ગૌરીશંકર મહોલ્લામાં મણીભાઈ નામના રહીશનું ત્રણ માળનું મકાન આવેલું છે. આશરે દસ વર્ષ પહેલાં તેમણે મકાનના ટેરેસ ઉપર મોબાઈલ ટાવર ઊભો કરવા માટે ભાડે જગ્યા આપી હતી. આ વિસ્તાર અત્યંત ગીચ વસ્તી ધરાવે છે અને આસપાસમાં શાળા તેમજ અન્ય રહેણાક મકાનો પણ આવેલા છે. સોમવારે બપોરે આશરે 2:15 વાગ્યાના અરસામાં ટેરેસ પર સ્થિત મોબાઈલ ટાવરના જનરેટરમાં વાયરિંગ શોર્ટ સર્કિટ થવાના કારણે અચાનક આગ ભૂકી ઊઠી હતી. જનરેટરમાંથી ધુમાડાના ગોટેગોટા નીકળતા જોઈ આસપાસના રહીશોમાં ભારે ડરનો માહોલ છવાઈ ગયો હતો. આ બનાવ અંગે તુરંત નવસારી ફાયર બ્રિગેડને જાણ કરવામાં આવતા લાશ્કરો ઘટનાસ્થળે પહોંચી ગયા હતાં અને સમયસૂચકતા વાપરી આગને વધુ પ્રસરાતા અટકાવી સંપૂર્ણ કાબૂમાં લીધી હતી. અત્રે નોંધનીય છે કે, થોડા સમય પહેલાં પણ આજ મોબાઈલ ટાવરના જનરેટર રૂમમાં આગ લાગી હતી, જેને સ્થાનિક લોકોએ સમયસર બુઝાવી દીધી હતી.ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
