Community News & Updates

Stay informed with the latest happenings, achievements, and announcements from our community.

All News

calendar_today October 22, 2026

Tharad : બહેનનાં પ્રેમીનો કાંટો કાઢવા ભાઈએ યુવકને દારૂમાં નશાની ગોળી ભેળવી ગળેટૂંપો આપી પતાવી દીધો

વાવ તાલુકાના વાવ ગામની સીમમાં સ્વરૂપ પાટીયા તરીકે ઓળખાતા ખેતરના ઢાળિયામાં 18 વર્ષીય યુવકની ગળેફાંસો ખાધેલી હાલતમાં લાશ મળી આવતા યુવાને આત્મહત્યા કર્યાનું જણાતું હતું પરંતું પરિવારજનોને શંકા જતા આ મામલે મેડીકલ રિપોર્ટનાં આધારે તપાસ કરાતા યુવકની હત્યા થયાનું ખુલ્યું છે. હત્યાની આ ઘટનામાં વાત કઈંક એવી હતી કે, 18 વર્ષીય અશોક ભગાભાઈ ઠાકોર નામના યુવકને ગામની જ એક યુવતી સાથે છેલ્લા બે વર્ષથી પ્રેમ હતો અને યુવક - યુવતી એકબીજાને અવાર-નવાર મળતા હતા. આ વાતની જાણ યુવતીનાં ભાઈ મહેશ કરશનભાઈ ઠાકોરને થઈ જતા યુવક સાથે અગાઉ ઝઘડો પણ કર્યો હતો છતા પણ યુવતીનાં ભાઈનાં મનમાં બહેનનાં પ્રેમીનો કાંટો કાઢી નાંખવાનું સુઝયું અને દારૂ પીવા બોલાવી નશામાં ચકનાચુર યુવકને ગળેફાંસો આપી દીધો હતો. આ ઘટનામાં વાવ પોલીસ સ્ટેશનમાં નોંધાયેલી ફરિયાદના આધારે પોલીસે બે ઈસમો સામે હત્યા અને મદદગારીનો ગુનો નોંધી વધુ તપાસ હાથ ધરી છે. મળેલી વિગતો અનુસાર, મૃતક અશોક ઠાકોરને આરોપી મહેશ કરશનભાઈ ઠાકોરની બહેન સાથે વિતેલા બે વર્ષથી પ્રેમસંબંધ હતો. આ બાબતને લઈને આશરે પંદર દિવસ પહેલાં મહેશ અને અશોક વચ્ચે બોલાચાલી અને ઝઘડો પણ થયો હતો. પ્રેમ સંબંધ મંજૂર ન હોવાથી મહેશ ઠાકોરે અશોકની હત્યા કરવાનું ષડયંત્ર રચ્યું હતું.ગત તારીખ 21/10/2026ના રોજ સાંજના સમયે આરોપી મહેશ ઠાકોર અને કીરણ જોહાભાઈ ઠાકોરે અશોકને દારૂ પીવડાવ્યો હતો. આરોપીઓએ દારૂની બોટલમાં નશાની ચાર ગોળીઓ ભેળવી દઈ અશોકને અતિશય નશાની હાલતમાં કરી દીધો હતો. ત્યારબાદ અંધારું થતાં અશોકને ખેતરના ઢાળિયામાં લઈ જઈ ગળાના ભાગે ટૂંપો આપી તેની હત્યા કરી નાખી હતી. હત્યા કર્યા બાદ આરોપીઓએ બનાવને આત્મહત્યામાં ખપાવવા માટે મૃતક અશોકના જ શર્ટ (પેરણ) વડે તેના મૃતદેહને ઢાળિયાના લાકડા (નાટે) સાથે લટકાવી દીધો હતો અને સ્થળ પરથી ફરાર થઈ ગયા હતા. મૃતકના ભાઈ મુકેશભાઈ ઠાકોરે અશોકની શોધખોળ હાથ ધરતાં ઢાળિયામાંથી મૃતદેહ મળી આવ્યો હતો. તેના પગ ઘૂંટણ સુધી જમીનને અડેલા હોવાથી અને ગળા પર ફંસાના નિશાન ન હોવાથી પરિવારે શંકા વ્યક્ત કરી 108 મારફ્તે વાવ સરકારી હોસ્પિટલ ખસેડયો હતો, જ્યાં તબીબોએ તેને મૃત જાહેર કર્યો હતો.મૃતકના ભાઈ મુકેશભાઈ ભગાભાઈ ઠાકોરની ફરિયાદના આધારે વાવ પોલીસે મુખ્ય આરોપી મહેશ કરશનભાઈ ઠાકોર (હાલ રહે. વાવ સીમ, મૂળ રહે. ખરડોલ) અને કીરણ જોહાભાઈ ઠાકોર (રહે. ઊંચપા) વિરુદ્ધ હત્યાનો ગુનો નોંધી વધુ તપાસ પી.આઈ. હાર્દિક દિનેશ મકવાણાએ હાથ ધરી છે.ગુજરાતના વધુ સમાચાર વાંચવા માટે ક્લિક કરો

Read Full Story arrow_forward

calendar_today October 22, 2026

Palanpur : હાઈવે પર 3 લોકોને કચડી નાસી છુટેલો ટેન્કર ચાલક ઝડપાયો

ગત તા.19/10/2026 ના રોજ રાત્રિના સુમારે પાલનપુર - ડીસા હાઈવે પર બાદરપુરા(ખોડલા) ગામના પાટીયા નજીક એક ગમખ્વાર અકસ્માત સર્જાયો હતો. જેમાં સફેદ રંગના અજાણ્યા ટેન્કરના ચાલકે પોતાના કબજાનું વાહન પુરઝડપે અને બેદરકારીપૂર્વક ચલાવી સોતમલા ગામના રીક્ષા ચાલક શ્રવણભાઈ દિનેશભાઈ માજીરાણાની રીક્ષાને પાછળથી જોરદાર ટક્કર મારી હતી. આ અકસ્માતમાં રીક્ષા ચાલક શ્રવણભાઈ તેમજ રીક્ષામાં પાછળ બેઠેલા શ્રમજીવી વયોવૃદ્ધ દંપતિ ચેહરાભાઈ દજાભાઈ મુલુપુરા અને લાસુબેન ચેહરાભાઈ મુલુપુરા બંને રહે.સાંડિયા, તા.ડીસાવાળાને ગંભીર ઈજાઓ પહોંચતા ત્રણેયના ઘટનાસ્થળે જ કરૂણ મોત નીપજ્યા હતા. અકસ્માત સર્જી ટેન્કર ચાલક પોતાનું વાહન લઈને ઘટનાસ્થળેથી ભાગી છુટયો હતો. આ અંગે ગઢ પોલીસ મથકમાં ફરીયાદ નોંધાઈ હતી. અકસ્માતમાં જાન ગુમાવનાર રીક્ષા ચાલક પરીવારનો એકમાત્ર મોભી હતો અને તેના પર જ પરિવારનું ગુજરાન ચાલતું હતું. જ્યારે મૃતક દંપતી પણ સામાન્ય મજૂર વર્ગનું હતું. અકસ્માત સર્જનાર ટેન્કર ચાલક રાત્રિના અંધારાનો લાભ લઈ પોલીસ અને ઓથોરિટીને જાણ કર્યા વગર નાસી ગયો હોવાથી આ ગુનો શોધી કાઢવો પોલીસ માટે મોટો પડકાર હતો. બનાસકાંઠા રેન્જ આઈજી પરીક્ષિતા રાઠોડ અને બનાસકાંઠા પોલીસ અધિક્ષક પ્રશાંત સુંબેની સૂચનાથી એલસીબી પી.આઈ. ડી.એમ.રાઠોડના માર્ગદર્શન હેઠળ પોલીસ સબ ઈન્સ્પેક્ટર આર.બી.જાડેજા અને જે.એસ.ગઢવીની ટીમ બનાવી તપાસ ધમધમાવવામાં આવી હતી. એલ.સી.બી. ટીમની પ્રાથમિકતા તપાસમાં અકસ્માત સર્જનાર વાહન પેટ્રોલિયમ ચીજવસ્તુઓની હેરાફેરી કરતું ટેન્કર હોવાની કડી મળી હતી. જેના આધારે ચંડીસર સ્થિત એચપીસીએલ કંપનીના ટર્મિનલ સ્ટેશન તરફ તપાસ કેન્દ્રિત કરવામાં આવી હતી. એચપીસીએલ ખાતે દૈનિક હજારો ટેન્કરોની અવરજવર હોવાથી એલસીબીની ટીમે પાલનપુરથી લઈને ચંડીસર એચપીસીએલ ટર્મિનલ સુધીના આશરે 160 થી વધુ સીસીટીવી કેમેરા બારીકાઈથી ચેક કર્યા હતા. સીસીટીવી ચકાસણી દરમ્યાન અકસ્માતમાં સંડોવાયેલ ટેન્કરનો નં. જીજે 18 બીટી 8500 હોવાનું સ્પષ્ટ થયું હતું. ટેન્કર માલિક શેખાવત પેટ્રોલિયમ અંગેની વિગતો મેળવી તપાસ કરતા માલુમ પડયું હતું કે ઘટનાના દિવસે ટેન્કર ચાલક મહેશભાઈ અંબાભાઈ શેખલીયા રહે.મોટા, તા.પાલનપુરવાળો છત્રાલ ખાતે આવેલ પેટ્રોલિયમ પરથી ખાલી ટેન્કર લઈ ડીઝલ-પેટ્રોલ ભરવા ચંડીસર જઈ રહ્યો હતો ત્યારે રસ્તામાં બાદરપુરા નજીક આ અકસ્માત સર્જાયો હતો. એલસીબી પાલનપુરની ટીમે ટેન્કર ચાલક મહેશભાઈ અંબાભાઈ શેખલીયાને ટેન્કર સાથે ઝડપી પાડી આગળની કાયદેસરની તપાસ અને કાર્યવાહી અર્થે ગઢ પોલીસ મથકને સોંપી આપેલ છે.ગુજરાતના વધુ સમાચાર વાંચવા માટે ક્લિક કરો

Read Full Story arrow_forward

calendar_today October 22, 2026

Palanpur : દિવ્યાંગો, વિધવા બહેનો હરિદ્વાર યાત્રાએ

બનાસકાંઠા જિલ્લાના પાલનપુર રેલવે સ્ટેશન પરથી દિવ્યાંગજનો અને વિધવા બહેનો માટેની વિશેષ હરિદ્ધાર તીર્થયાત્રાને લીલી ઝંડી દર્શાવી રવાના કરવામાં આવી હતી. આ પ્રસંગે રાજ્યના મંત્રી પ્રવીણ માળીએ હાજરી આપીને તમામ યાત્રાળુઓને શુભકામનાઓ પાઠવી હતી. મંત્રીએ જણાવ્યું હતું કે મા ગંગાના પવિત્ર સ્ન્ના સાથે દિવ્યાંગો સમાજમાંથી વ્યસન નાબુદી માટેના સંકલ્પ સાથે વ્યસન મુક્ત ગુજરાતના બ્રાન્ડ એમ્બેસેડર બનશે. ભગિની સમાજના મેનેજિંગ ડિરેક્ટર ડો.દિનેશ પટેલ અને તેમની સંસ્થાના પવિત્ર પ્રયાસોથી ઉત્તર ગુજરાતના સાબરકાંઠા, મહેસાણા, પાટણ અને બનાસકાંઠા જિલ્લાના દિવ્યાંગ ભાઈ-બહેનો તેમજ વિધવા બહેનો માટે આવી યાત્રાનું આયોજન વર્ષ 2015 થી શરૂ કરવામાં આવેલ છે. આ વર્ષે લગભગ 150 જેટલા યાત્રાળુઓનો કાફલો હરિદ્ધાર, ઋષિકેશ અને ગંગા દર્શન અને કથા શ્રવણ માટે રવાના થયો છે. આ અંગે રાજ્યમંત્રી પ્રવિણભાઈ માળીએ જણાવ્યું હતું કે અનેક દિવ્યાંગજનો પ્રથમ વખત હરિદ્ધાર જઈ રહ્યા છે. જે એક અત્યંત સંવેદનશીલ અને આનંદનો અવસર છે. દિવ્યાંગો ગંગા મૈયામાં ડૂબકી લગાવીને વ્યસન મુક્તિનો સંકલ્પ લેશે અને પરત ફરીને સમાજમાં વ્યસન કરતા લોકોને ઘરે જઈ વ્યસન છોડાવવાનું કાર્ય કરશે. પ્રધાનમંત્રીના વ્યસન મુક્ત ભારત અભિયાનમાં આ દિવ્યાંગો મહત્ત્વનું યોગદાન આપશે. સંસ્થાના આયોજક ડો.દિનેશ પટેલે જણાવ્યું હતું કે, 2015 થી શરૂ થયેલી આ સેવાયાત્રા અંતર્ગત અત્યાર સુધીમાં વિવિધ જિલ્લાના સેંકડો દિવ્યાંગોને તીર્થયાત્રા કરાવવામાં આવી છે. તમામ યાત્રાળુઓ 27 મી તારીખે ધામધુમથી પરત ફરશે. મંત્રી તેમજ ઉપસ્થિત મહાનુભાવોએ તમામ દિવ્યાંગોના સુખ-સમૃદ્ધિ અને ઉત્તમ સ્વાસ્થ્ય માટે પ્રાર્થના કરી હતી.ગુજરાતના વધુ સમાચાર વાંચવા માટે ક્લિક કરો

Read Full Story arrow_forward