Community News & Updates

Stay informed with the latest happenings, achievements, and announcements from our community.

All News

calendar_today October 25, 2026

Nadiad: ડભાણ SOG ખાતે નેશનલ બાઈક રેલીનું પુષ્પવર્ષા સાથે સ્વાગત

વડાપ્રધાન નરેન્દ્રભાઈ મોદીના વર્ષ 2029 સુધીમાં ભારતમાંથી નશાને નાબુદ કરી દેવાના સંકલ્પને સાકાર કરવા માટે નશામુક્ત ભારત અભિયાન અંતર્ગત નેશનલ બાઈક રેલીનું આયોજન કરાયું હતું. આ રેલીમાં સીઆરપીએફ, બીએસએફ, એનએસજી, એનઆઈએ, આઈટીબીપી, એનસીબી, વિવિધ એજન્સીઓ તથા વિવિધ રાજ્ય પોલીસ દળના જવાનોને સમાવિષ્ટ કરતાં 200 બાઈક રાઈડર્સે ભારતના લેહ લદાખથી રેલીનું પ્રસ્થાન કર્યું હતું. જે રેલી ભારતના વિવિધ રાજ્યોમાંથી પસાર થઈને ગુજરાતના અલગ અલગ જિલ્લાઓમાંથી પસાર થઈ ખેડા જિલ્લામાં પણ આગમન થવાનું હોઈ ખેડા જિલ્લાના પોલીસ વડા વિજય પટેલ દ્વારા રેલીનું ઉષ્માભર્યું સ્વાગત કરવાની સુચના આપી હતી. જેને લઈને ખેડા જિલ્લા પોલીસ દ્વારા નડિયાદ ડભાણ રોડ પર આવેલ એસઓજી ખાતે રેલીનું પુષ્પવર્ષા અને પોલીસ બેંડ દ્વારા ભવ્ય સ્વાગત કર્યું હતું. આ દરમિયાન ખેડા જિલ્લા પોલીસ ઉપરાંત વિદ્યાર્થીઓ, નગરજનો પણ ઉપસ્થિત રહ્યા હતા. ઉચ્ચ પોલીસ અધિકારીઓ દ્વારા ઉપસ્થિત સૌને નશામુક્ત ભારત અભિયાનના સંકલ્પ વિશે સમજ અને સહકાર આપવા અપિલ કરી હતી. કાર્યક્રમ બાદ ખેડા જિલ્લાના પોલીસ અધિકારીઓએ નેશનલ બાઈક રેલીને એકતાનગર કેવડીયા તરફ જવા માટે લીલી ઝંડી બતાવી પ્રસ્થાન કરાવ્યું હતું.ગુજરાતના વધુ સમાચાર વાંચવા માટે ક્લિક કરો 

Read Full Story arrow_forward

calendar_today October 25, 2026

Kheda: મહેમિયાદ તાલુકાના ખાત્રજ ગામે બાવળનાં ઝાડ સગેવગે કરવાના કારસાથી ખળભળાટ

ખેડા જિલ્લામાં મહેમિયાદ તાલુકાના ખાત્રજ ગામમાં ગ્રામ પંચાયતના સત્તાવાર લેટરપેડ પર તલાટી અને સરપંચની કથિત ખોટી સહીઓ કરીને ગામની સીમમાં પડેલાં બાવળનાં ઝાડ કોઈ હરરાજી કે કાયદેસરની પ્રક્રિયા વિના મફ્તમાં લઈ જવાની મંજૂરી અપાઈ હોવાના આક્ષેપથી ચકચાર મચી છે. ગત 2 ઓક્ટોબરના રોજ કાળાભાઈ ઉદાભાઈ સોઢાને બાવળનાં ઝાડ લઈ જવા માટે લેટરપેડનો ઉપયોગ થયાનું સામે આવ્યું છે. જોકે, તલાટી અને સરપંચ બંનેએ લેટરપેડનો ઉપયોગ પોતે કર્યો ન હોવાનું જણાવ્યું હોવાના કારણે સમગ્ર મામલો વધુ શંકાસ્પદ બન્યો છે. પંચાયતના સત્તાવાર દસ્તાવેજનો ઉપયોગ કોણે અને કયા અધિકારથી કર્યો, તે અંગે હવે જવાબદારી નક્કી કરવાની પણ માગ ઊઠવા પામી છે.આ અંગેની વધુમાં પ્રાપ્ત વિગતો અનુસાર, ખાત્રજ ગ્રામ પંચાયતના લેટરપેડ પર તલાટી અને સરપંચની સહીઓ દર્શાવી ગામની સીમમાં પડેલાં બાવળનાં ઝાડ લઈ જવા માટે મંજૂરીપત્ર જેવો દસ્તાવેજ તૈયાર કરવામાં આવ્યો હોવાનો આક્ષેપ છે. આ અંગે તલાટીએ જણાવ્યું હોવાનું કહેવાય છે કે તેઓ ગામના લેટરપેડનો ઉપયોગ કરતા નથી અને નોટિસ સહિતનાં સરકારી કામો માટે પંચાયતના કમ્પ્યુટરમાંથી સીધી લેટરપેડની નકલ કાઢે છે. બીજી તરફ્ સરપંચે પણ પોતે આ લેટરપેડનો ઉપયોગ કર્યો ન હોવાનું જણાવ્યું છે. ત્યારે સૌથી મોટો સવાલ એ છે કે જો બંને જવાબદાર પદાધિકારીઓએ લેટરપેડનો ઉપયોગ કર્યો નથી, તો તેમના નામે સહીઓ કોણે કરી અને દસ્તાવેજ તૈયાર કરવાની સત્તા કોને આપી? શું પંચાયતના સત્તાવાર લેટરપેડનો અન્ય કામોમાં પણ આવો જ દુરુપયોગ થયો છે? આ બાબતની તપાસ અનિવાર્ય બની છે. જો સહીઓ ખોટી હોવાનું અને દસ્તાવેજનો ગેરકાયદે ઉપયોગ થયાનું પુરવાર થાય, તો ભારતીય ન્યાય સંહિતા, 2023ની બનાવટી દસ્તાવેજો તૈયાર કરવા અને તેનો ઉપયોગ કરવા સંબંધિત જોગવાઈઓ લાગુ પડતી હોય તો તેની હેઠળ કાયદેસરની કાર્યવાહી થઈ શકે છે. સરકારી સંપત્તિની હરાજી કે નિકાલ માટે લાગુ નિયમોનું પાલન થયું હતું કે નહીં, તેની પણ તપાસ થવી જોઈએ. ઉચ્ચ અધિકારીઓ દ્વારા મૂળ લેટરપેડ, પંચાયતના રેકોર્ડ, મંજૂરીપત્ર અને સંબંધિત સહીઓની નિષ્પક્ષ તપાસ કરાવી જવાબદાર વ્યક્તિ સામે કડક પગલાં ભરવાની માગ ઊઠી છે.ગુજરાતના વધુ સમાચાર વાંચવા માટે ક્લિક કરો

Read Full Story arrow_forward

calendar_today October 25, 2026

Anand: કરમસદ શ્રીકૃષ્ણ હોસ્પિટલ ખાતે રૂ. 28 કરોડના ખર્ચે નિર્મિત અત્યાધુનિક ઇમેજિંગ સેન્ટરનું લોકાર્પણ

ભાઈકાકા યુનિવર્સિટી સાથે સંલગ્ન અને ચારુતર આરોગ્ય મંડળ દ્વારા પ્રાયોજિત કરમસદની શ્રીકૃષ્ણ હોસ્પિટલ ખાતે રૂ. 28 કરોડના જંગી ખર્ચે નિર્મિત અત્યાધુનિક ઈસણાવ નિવાસી મોતીભાઈ અને જીજીબેન પટેલ ઇમેજિંગ સેન્ટરનું લોકાર્પણ અમેરિકાના સેન હોસે ખાતે વસતા દાતા અરવિંદભાઈ પટેલના 20 લાખ અમેરિકન ડૉલરના ઉદાર આર્થિક સહયોગથી વર્ષાબેન અરવિંદભાઈ પટેલના હસ્તે કરવામાં આવ્યું હતું. જેનાથી દર્દીઓ માટે કેન્સર, હૃદયરોગ, મગજ અને ચેતાતંત્રના રોગો, સ્તન સંબંધિત બીમારીઓ તથા હાડકાંની જટિલ સમસ્યાઓનું સમયસર અને ચોક્કસ નિદાન સુલભ બનશે. આશરે 1,650 ચોરસ મીટર વિસ્તારમાં ફેલાયેલી આ ભવ્ય ઇમારતનું બાંધકામ માત્ર 10 મહિનાના રેકોર્ડબ્રેક સમયમાં પૂર્ણ કરવામાં આવ્યું છે, જેમાં કેન્દ્રના રેડિયોડાયેગ્નોસિસ વિભાગના વડા ડૉ. વિરલ પટેલના જણાવ્યા અનુસાર દર્દીઓની ઝડપી તપાસ અને સચોટ નિદાન માટે 64-ચેનલ ટેકનોલોજી અને આર્ટિફ્શિયલ ઇન્ટેલિજન્સ (કૃત્રિમ બુદ્ધિમત્તા) આધારિત ઝડપી સ્કેનિંગ ધરાવતી સિમેન્સ મેગ્નેટોમ વિડા 3-ટેસ્લા એમ.આર.આઈ. સિસ્ટમ, દાંત તથા કાન, નાક અને ગળાના રોગો માટે ત્રિપરિમાણીય ઇમેજિંગ આપતી કેરસ્ટ્રીમ સી.એસ. 9600 કોન-બીમ સી.ટી. સિસ્ટમ, મહિલાઓમાં સ્તન કેન્સરના નિદાન માટે થ્રી-ડી ડિજિટલ બ્રેસ્ટ ટોમોસિન્થેસિસ ટેકનોલોજીથી સજ્જ ફુજીફ્લ્મિ એમ્યુલેટ સોફિનિટી મેમોગ્રાફી સિસ્ટમ મોટરચાલિત પોઝિશનિંગ ધરાવતી ભારતની પ્રથમ ડી.આર.જેમ ડાયમંડ યુ-આર્મ ડિજિટલ એક્સ-રે સિસ્ટમ ઉપરાંત યકૃત અને ગર્ભાવસ્થાના થ્રી-ડી/ફેર-ડી અલ્ટ્રાસાઉન્ડ (સોનોગ્રાફી), હૃદય તપાસ માટે જી.ઈ.નું 128-લાઇસ સી.ટી. સ્કેનર, ગાંઠના ચોક્કસ સ્થાન માટે પી.એેટ-સી.ટી. તથા પી.એેટ-એમ.આર.આઈ. ઇમેજ ફ્યુઝન અને હાડકાંની ઘનતા માપી ઓસ્ટિયોપોરોસિસ ચકાસવા માટે ઓસ્ટિયોસિસ પ્રિમસ ડેક્સા સિસ્ટમ જેવી અત્યાધુનિક સુવિધાઓ ઉપલબ્ધ કરવામાં આવી છે, જે તબીબી શિક્ષણ, સંશોધન અને સારવારના આયોજનને વેગ આપશે.આ સેન્ટર અંગે મેડિકલ સુપરિન્ટેન્ડેન્ટ ડૉ. જીતેશ દેસાઈએ જણાવ્યું હતું કે આ લોકપયોગી સેવાના ઉઘ્દાટન પ્રસંગે ચારુતર આરોગ્ય મંડળના ટ્રસ્ટી જાગૃત ભટ્ટ, સેક્રેટરી અમિત પટેલ, બોર્ડના સભ્યો અને ભાઈકાકા યુનિવર્સિટીનાં રજિસ્ટ્રાર ડૉ. જ્યોતિ તિવારી સહિતના અનેક મહાનુભાવોએ વિશેષરૂપે ઉપસ્થિત રહીને આ નવતર પહેલને બિરદાવી હતી.ગુજરાતના વધુ સમાચાર વાંચવા માટે ક્લિક કરો 

Read Full Story arrow_forward