Surendranagar: ટ્રકમાં સોયાબીનની આડમાં રાજસ્થાનથી સૌરાષ્ટ્રમાં દારૂના જથ્થાને ઘુસાડવાનો ખેલ
સુરેન્દ્રનગર એલસીબી ટીમે લીંબડી-સાયલા નેશનલ હાઈવે પર વોચ રાખી રાજસ્થાનથી જામનગર સોયાબીનની આડમાં જતા ટ્રક ચાલકને દારૂની 4,396 બોટલ સહિત રૂ. 70.26 લાખના મુદ્દામાલ સાથે ઝડપી લીધો છે. બીજી તરફ સુરેન્દ્રનગર રેલવે સ્ટેશને નાહરલાગુનથી હાપા જતી ટ્રેનમાં ઉતરેલો રાણપુરની કંપનીનો ઓપરેટર દારૂની બોટલ સાથે પકડાયો છે.સુરેન્દ્રનગર એલસીબી ટીમના પ્રવીણ કોલા, ભરતભાઈ સભાડ સહિતનાઓને લીંબડી ડીવીઝનમાં પેટ્રોલીંગ દરમીયાન બગોદરાથી જામનગર તરફ વિદેશી દારૂ ભરેલ સફેદ ટ્રક જતો હોવાની બાતમી મળતા લીંબડી-સાયલા નેશનલ હાઈવે પર ચૂડા તાલુકાના નવી મોરવાડ પાસે વોચ રાખી હતી. જેમાં બાતમીવાળો ટ્રક આવતા તેને રોકી તપાસ કરતા તેમાં સોયાબીનની આડમાં વિદેશી દારૂ મળી આવ્યો હતો. ટ્રકના ચાલક પોરબંદરના નાગકા ગામના રામ અજાભાઈ મોરીની પુછપરછ કરતા પોરબંદરના ખાપટ ગામના જગા રીણાભાઈ રબારીને તેને કોલ કરીને રાજસ્થાનના ભીલવાડાથી દારૂ ભરેલી ટ્રક લઈને આવવાની અને જામનગર મોકલવાની હોવાનું જણાવી રૂ. 70 હજાર ટ્રીપ પેટે આપ્યા હતા. જેમાં ભીલવાડાની સહયોગ હોટલથી તે દારૂ ભરીને જામનગર જતા પકડાયો હતો. પોલીસે દારૂની 4,396 બોટલ, 2.61 લાખની સોયાબીનની 580 થેલી, મોબાઈલ અને ટ્રક સહિત રૂ. 70,26,600નો મુદ્દામાલ જપ્ત કર્યો છે. અને ઝડપાયેલ રામ મોરી ઉપરાંત જગા રબારી, દારૂ આપનાર, દારૂ મંગાવનાર સહીતનાઓ સામે ગુનો નોંધી વધુ તપાસ હાથ ધરી છે. જયારે સુરેન્દ્રનગર રેલવે પીએસઆઈ સી.પી.બાવળીયા સહિતનાઓ રેલવે સ્ટેશને પેટ્રોલિંગ કરી રહ્યા હતા. ત્યારે નાહરલાગુનથી હાપા જતી ટ્રેન પ્લેટફોર્મ નં. 1 પર આવતા તેમાંથી ઉતરેલ એક મુસાફર શંકાસ્પદ લાગ્યો હતો. આથી આ શખ્સની તપાસ કરાતા તેની પાસેથી વિદેશી દારૂની 1 બોટલ કિંમત રૂ. 930ની મળી આવી હતી. આથી પોલીસે મુળ ઉત્તરપ્રદેશના અને હાલ બોટાદ જિલ્લાના રાણપુર ખાતેની એક ખાનગી કંપનીમાં ઓપરેટર તરીકે ફરજ બજાવતા અને કંપનીના કવાર્ટરમાં રહેતા 43 વર્ષીય અજયકુમાર રાજારામભાઈ પાલની ધરપકડ કરી તેની સામે પ્રોહીબીશન મુજબ ગુનો નોંધ્યો છે. ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
