New delhi: યોગા પછી આયુર્વેદને ગ્લોબલ ઓળખ આપવા બજેટમાં ત્રણ ઓલ ઈન્ડિયા ઈન્સ્ટિ.ની જાહેરાત
કેન્દ્રીય નાણાપ્રધાન નિર્મલા સિતારામને રવિવારે સંસદમાં કેન્દ્રીય બજેટ 2026-27 રજું કરતાં આયુર્વેદ સેક્ટરને મોટો વેગ આપવાની જાહેરાત કરી હતી. તેમણે દુનિયામાં આયુર્વેદિક દવાઓની વધતી જતી માંગને ધ્યાનમાં રાખીને ત્રણ નવા ઓલ ઈન્ડિયા ઈન્સ્ટિટયુટ ઓફ આયુર્વેદ સ્થાપિત કરવાની જાહેરાત કરી હતી. પોતાના બજેટ ભાષણમાં નાણાપ્રધાને જણાવ્યું હતું કે કોવિડ બાદ આયુર્વેદને વૈશ્વિક સ્તર પર નવી ઓળખ મળી છે. તેમણે જણાવ્યું હતું કે પ્રાચિન ભારતીય યોગને પહેલેથી જ સમગ્ર વિશ્વમાં સન્માન મળી ચુક્યું છે જેને વડાપ્રધાને સંયુક્ત રાષ્ટ્ર સુધી પહોંચાડયું છે. કોવિડ બાદ આયુર્વેદને પણ એજ પ્રમાણે વૈશ્વિક સ્વિકાર્યતા મળી છે. ગુણવત્તા ધરાવતાં આયુર્વેદ ઉત્પાદનોની નિકાસ ખેડૂતોને ઔષધિય ગુણ ધરાવતાં છોડ ઉગાડવા તથા તેના પ્રોસેસિંગ સાથે જોડાયેલાં જોડાયેલાં લોકોને પ્રોત્સાહન આપે છે. વધતી જતી આંતરરાષ્ટ્રીય માંગને પહોંચી વળવા માટે હવે નવા ત્રણ ઓલ ઈન્ડિયા આયુર્વેદ સંસ્થા ખોલવામાં આવશે. નોંધનીય છે કે નવી દિલ્હી સ્થિત ઓલ ઈન્ડિયા ઈન્સ્ટિટયુટ ઓફ આયુર્વેદ પહેલેથી જ આયુર્વેદની સારવારને વેગ આપવા માટે કામ કરી રહ્યું છે.નાણાપ્રધાને એવી પણ જાહેરાત કરી હતી કે આયુષ ફાર્મસીઓ તથા ડ્રગ ટેસ્ટિંગ લેબ્સને ઉચ્ચ માપદંડ અનુસાર અપગ્રેડ કરવામાં આવશે કે જેથી કુશળ માનવ સંસાધન તૈયાર કરી શકાય. કેન્દ્ર સરકારે ગુજરાતમાં આવેલા WHO Global Traditional મેડીસીન સેન્ટરને મજબૂત કરવાની જાહેરાત કરી હતી. આ કેન્દ્ર પારંપારિક ચિકિત્સા પર રીસર્ચ, ટ્રેઇનિંગ તથા જાગરુકતા માટે વૈશ્વિક નોલેજ હબના રુપમાં કામ કરે છે અને તે વિશ્વનું પ્રથમ એવું આંતરરાષ્ટ્રીય કેન્દ્ર છે. ઉલ્લેખનીય છે કે કેન્દ્રની મોદી સરકાર સત્તા પર આવી ત્યારથી જ આયુષ મંત્રાલયના નેજા હેઠળ આયુર્વેદ સહિતની અન્ય વૈકલ્પિક સારવાર પદ્ધતિઓ પર તેનું સતત ફોકસ રહ્યું છે અને આ નિર્ણયથી લોકોને વધારે ફાયદો થશે. આવા જ વધુ સમાચાર વાંચવા માટે ક્લિક કરો
Read Full Story arrow_forward
