Disa : રાજરાજેશ્વરી જોગમાયા માતાનો પ્રાણ પ્રતિષ્ઠા
ડીસા તાલુકાના બોડાલ ગામે શ્રી રાજરાજેશ્વરી જોગમાયા શ્રી ગોગા મહારાજ તથા મા ખોડિયાર માતાજીના નવનિર્મિત ભવ્ય મંદિરમાં આયોજિત ત્રિ- દિવસીય પ્રાણ પ્રતિષ્ઠા મહોત્સવ ભક્તિભાવ અને ઉત્સાહભેર રંગેચંગે સંપન્ન થયો હતો. તા.19થી 21 ઓક્ટોબર દરમિયાન યોજાયેલા આ મહોત્સવમાં સમસ્ત ગ્રામજનો સહિત દૂરદૂરથી આવેલા ધર્મપ્રેમી ભક્તોએ મોટી સંખ્યામાં ભાગ લીધો હતો. મહોત્સવના પ્રારંભે દીપ પ્રાગટય, ગૌપૂજન, પંચાંગ કર્મ, મંડપ પ્રવેશ, વાસ્તુ સ્થાપન, દેવી-દેવતાઓનું પૂજન, કુંડ પૂજન અને નવચંડી યજ્ઞ સહિતની ધાર્મિક વિધિઓ યોજાઈ હતી. વૈદિક મંત્રોચ્ચાર વચ્ચે યજ્ઞશાળામાં ધાર્મિક વાતાવરણ સર્જાયું હતું. મહોત્સવના બીજા દિવસે મંગળવારે સ્થાપિત દેવી-દેવતાઓનું પૂજન, 108 કળશથી સ્નાપન અને અભિષેક, ધાન્યાધિવાસ, પુષ્પાધિવાસ, અન્નાધિવાસ, વસ્ત્ર્રાધિવાસ તેમજ મંદિર વાસ્તુ યજ્ઞની વિધિઓ કરવામાં આવી હતી. આ પ્રસંગે ભવ્ય શોભાયાત્રા પણ નીકળી હતી, જેમાં મોટી સંખ્યામાં ગ્રામજનો અને ભક્તો જોડાયા હતા. રાત્રે કલાકારોના લોકડાયરામાં શ્રોતાઓ ઉમટયા હતા. અગાઉ સંતવાણીના કાર્યક્રમમાં પણ ભક્તોએ ભાવપૂર્વક ભાગ લીધો હતો. મહોત્સવના અંતિમ દિવસે બુધવારે વિજયાદશમીના પાવન અવસરે સવારે 11 વાગ્યે શાસ્ત્ર્રોક્ત વિધિ-વિધાન સાથે માતાજીઓની પ્રાણ પ્રતિષ્ઠા કરવામાં આવી હતી. મૂર્તિ ન્યાસ, મહાન્યાસ, દિવ્ય કળશ અને ધજા રોહણ સહિતની વિધિઓ બાદ પૂર્ણાહુતિ અને ભવ્ય મહાઆરતી યોજાઈ હતી. સમસ્ત બોડાલ ગ્રામજનો દ્વારા ત્રણેય દિવસ ભક્તો માટે મહાપ્રસાદની વ્યવસ્થા કરવામાં આવી હતી. આ પ્રસંગે સંતો મહંતો સહિત રાજ્યભરના વિવિધ રાજકીય આગેવાનો સામાજિક આગેવાનો અને મોટી સંખ્યામાં ભાવિ ભક્તોની હાજરી રહ્યા હતા. ત્યારે શંખનાદ, વેદમંત્રો અને માતાજીના જયઘોષથી સમગ્ર ગામ ભક્તિમય બન્યું હતું. ધાર્મિક આસ્થા, ગ્રામજનોની એકતા અને સહયોગનું પ્રતીક બનેલો આ મહોત્સવ હર્ષોલ્લાસ સાથે સંપન્ન થયો હતો.ગુજરાતના વધુ સમાચાર વાંચવા માટે ક્લિક કરો
Read Full Story arrow_forward
